July 29, 2021

राजनीतिक प्रतिवेदन ल्याउने सहमति बनेको

नेकपाका केन्द्रीय सदस्य शेरबहादुर तामाङले अध्यक्षद्वय केपी ओली र प्रचण्डको फरक फरक प्रतिवेदन समायोजन गरी एउटै राजनीतिक प्रतिवेदन ल्याउने सहमति बनेको बताउनुभएको छ ।रिपोर्टर्स क्लब नेपालको साक्षात्कारमा तामाङले अध्यक्षद्वय ओली र प्रचण्डको प्रतिवेदनको आरोप प्रत्यारोपलाई फिर्ता लिएर सकारात्मक र समिक्षात्मक विषय समावेश गरी साझा प्रतिवेदन बनाइने सहमति भएको बताउनुभयो ।पार्टीमा पछिल्लो समय उठेका कतिपय विषयहरुको टुंगो स्थायी कमिटी बैठक बसी कार्यदल बनाएर लगाउने सहमति समेत बनेको उहाले बताउनुभयो ।पार्टीभित्र बहस र विवाद हुनुलाई सामान्य भन्दै समस्याको समाधान गरिने उहाले बताउनुभयो ।

साक्षात्कारमा नेपाली काँग्रेसका केन्द्रीय सदस्य प्रदीप पौडेलले प्रधानमन्त्री केपी शर्मा ओलीलाई इतिहासकै असफल प्रधानमन्त्री भएकाले पदमा बस्ने नैतिक आधार समाप्त भएको बताउनुभयो । राष्ट्रिय जनता पार्टीका महासचिव केशव झाले प्रधानमन्त्री केपी शर्मा ओलीको तत्काल विकल्प नखोजिए राजनीतिक प्रणाली नै धरापमा पर्ने बताउनुभयो ।उहाले पछिल्लो समय राजावादीको प्रदर्शनमा सत्तापक्षकै संलग्नता देखिएको टिप्पणी गर्नुभयो । नेकपाको झगडाले गणतन्त्र र संघीयताका विरोधीहरुले टाउको उठाउन थालेको उहाको भनाई छ ।

Leave a Reply

Your email address will not be published.